موسوعة أشهر الكذبات اللى بيضحكوا بيها على الستات أول كذبة هى ؟؟؟

اول كذبه : ( مفيش كرامه بين الرجل ومراته ) 

ازاى يا معلم ! هو كده يابنتى ... ويحكى لك بقى قصص عن انهم روح واحد فى جسدين وانه اقرب ليها من ابوها واخوها وكل الكلام الجميل ده .. بس نسيوا حاجه .. ان الجمله دى بتتقال لما هو الراجل اللى بيبقى غلطان فيها ... فهى بقى مامتها واخواتها وطنط نجوى وانكل مجدى بيقولوا لها كده .. وانها تسامح وتقبل ( شبه اعتذاره) او (ندمه العميق المختفى جوه تلابيب قلبه ) اه .. ماهو راجل ومش مفروض يبين مشاعره وكده بس اكيد هو ندمان واكيد هو عارف غلطته 

اما بقى لو هى اللى اتجننت فى عقلها وغلطت فيه .. حد يقدر يقول له مفيش كرامه بين الرجل ومراته !! فين طنط نجوى بقى وفين انكل مجدى دلوقتى ؟ اختفوا ؟ صح ... وتفضل هى ياعينى تبدى الندم والاسف وتصالح وهو يتمنع ومش قادر ينسى اللى هى عملته فيه .. اصلها جرحت كرامته !! يعنى دلوقتى فيه كرامه بين الرجل ومراته !! من الاخر يعنى الجمله دى بتتقال للستات بس علشان يتنازلوا عن حقهم .. ان شاء الله حقهم فى مجرد اعتذار من الرجل اللى غلط ..

ومما سبق يتبين ان كانوا بيضحكوا على بنات الناس 

لأن ...فيه كرامه بين الرجل ومراته ... فيه احترام لابد يبقى متبادل ... فيه اختراع اسمه يراعى مشاعرها ....ويعتذر لو غلط ... بكل بساطه ... الاتنين بنى آدمين لهم مشاعر بتنجرح ولهم قلوب بتحزن 

وتشيل ... اتقى الله يا مجتمعنا بقى !!

كتبت لنا مقالة اليوم الكاتبة 

Rabaa Ali

لينك صفحتها الشخصية على الفيس :

https://www.facebook.com/profile.php?id=100001151327345

#ليالينا #مشاهير #مصر

#انكل_مجدى_هرب

#تانت_نجوى_سكتت_خالص