بس انت زيط و احنا معاك

الاثنين، 17 نوفمبر 2014

صحفى قاعد فى بيتهم على النت راح قرى خبر فى جريدة بريطانية ( انا عن نفسي مسمعتش عنها قبل كده) خبر بيقول ان وبرا حتموت بعد ١٢ اسبوع و راح مترجم الخبر و للمصدقية كتب اسم المصدر ...... و الخبر فى اللينك ده للى يحب يشوفه

http://omojuwa.com/2014/11/oprah-winfrey-has-12-weeks-to-live/

اللى عجبني ان الباشا اللى فى الجريدة البريطانية علشان يُحبك الخبر راح مقسم التركة بتاعتها و كمان كاتب تعليق على لسانها..... و ده طبعاً للمصدقية ....بس ذي ما انتم شايفين كان حاطط لها صورة بتضحك .... و الخبر علشان فشينك محدش كذبه و فضل قاعد يومين على النت متحركش و لا انتشر لحد ما الصحفي بجريدة مصرى اليوم نقل الخبر و بعده بكام ساعة اليوم السابع و اخيراً امبارح نقلته الوفد لما فاقه من الغيبوبة و قاله ممكن يكون صح لان محدش كذبه .... و الحقيقة الخبر متكذبش لان السيدة اوبرا الامريكية طلع عنها اشاعة فى برطانيا و انتشرت فى مصر يبقى هى حتكذبها ليه و صدى صوتها موصلش عندها امريكا اساساً.... و الجميل ان المصرى اليوم على صفحتها مصرى اليوم لايت عملت تقرير كامل عن حياة المذيعة اللى حتموت ( زيطة بقى و مقالة من الهوا) ........ بس الاظرف من ده كله ان لما اليوم السابع اكتشفت ان الخبر فشينك راحوا شايلينه من على الموقع كأنهم معملوش حاجة و راحوا نشرين حياة اوبرا بصور علشان كأنهم مش هما اللى زودوا الاشاعة....بل بلعكس بيكذبوها ....

انا كاتبة الموضوع ده علشان تعرف ازاى لما تقرا خبر تعرف انه مضروب .... من الاخر كده لما تكون المذيعة امريكا مشهورة ذى اوبرا عندها ثروات طائلة و هى مهمة بنفس اهمية اوباما و يحصل لها حاجة ذى كدة اول حد حيكتب عنها غالبا Washington post , National post, New york times حاجة من الجرائد الجامدة بلاش ده كله الست اوبرا لها قناة على التلفيزيون و مجلة مطبوعة و موقع على النت اى واحدة منهم حيذاع فيها خبر مصيري ذى ده مش حيقعد فى مجلة مش فى نفس القاره حتى ....

فا يريت فكروا فى الخبر اللى بتقروه قبل ما تزيطوا مع اللى بيزيط

السؤال اللى بيطرح نفسه بقى فين روؤساء تحرير كل الصحف دى ؟؟؟؟؟؟؟ اموت واعرف بيحرروا ايه مدام مش بيقروا اصلاً .... و ليه حطيطوا الخبر بصورة لها و هى بتعيط :(

#اوبرا

#المصري_اليوم

#اليوم_السابع

#الوفد

نقطة للتوضيح لو حابين تعرفوا باقي قائمة الصحف اللى زاطوا مع الخبر و نشره... اكتبه على جوجل " اوبرا تستعد للموت" حيطلع لكم الصحف كلها لانهم مشاء الله كلهم مستخدمين نفس العنوان محدش كلف نفسه يغيره و للمعلومة مش حتلاقوا الخبر بتاع المصري اليوم لانه اتحذف من على موقعهم لكن البوست مزال موجود على الفيس بوك وهو اللى أنا مصوراه فوق .....

و اهلاً وسهلاً