المقص

امبارح اضطرتني الظروف لشراء مقص مطبخ جديد بعد حادثة اليمة لحقت بالمقص القديم .... حادثة بشعة قصفت عمر المقص و هو فى ريعان شبابه و هى انه انكسرت ايده ايييييييهيءءءءكان صغير مستحملش زعنفة السمكة و انا كنت المفروض مضغتش عليه كل ده ..... :(

المهم بصوا على صورة المقص الجديد ......

السؤال اللى بيأرقني : هما ليه مكتفينه كده ؟؟؟؟؟ خايفين يهرب مثلاً ....مش ممكن فعلاً المقص محتاج مقص تانى يحرره .... طيب افرض ان ده كان اول مقص تشتريه يبقى حتفتحوا ازاى ؟؟؟؟ و لحمين الاطراف يعنى علشان ايه ميروحش فى حتة.....

بس الحقيقة مش هو بس اللى متكتف كده حتى البطريات متكتفة كأنها لو اتعرضت للهوا ممكن تأخذ برد ..... هل علشان تكون معقمة مثلاً طيب ده الدوا بيعبه بأيدهم فى برطمنات يبقى هما خايفين على صحة اللعب و مش خايفين على صحة الانسان .....

فى حاجات تستاهل فعلا انها تتغلف و تتكتف كمان ذى اللمبات مثلاً لكن الحقيقة لا ....تعالى شوف الصورة دى
شايف شكل الكرتونة اللى هما متشالين فيها عاملة ازاى يعنى هما قاعدتهم فى العلبة هى اللى حتكسرهم ...... و على فكرة اللمبات دى أغلى من البطريات و المقصات على فكرة .....يبقى بتعمله فينا كده لييييه :)))) 

اسئلة بلا اجوبة للأسف ....

يومكم سعيد ....