الدنيا اتغيرت

اهلا و سهلا 

كل حاجة فى الدنيا اتغيرت بعد ما كنت بتسمع نتيجة الثانوية العامة فى الازاعة دلوقتى بتجيلك رسالة على الموبايل ... و لما ربنا يفتحها عليك و تدخل الجامعة حتلاقى نتيجة امتحناتك على الفيس بوك فى جروب الدفعة .... :) يعنى علشان لو محدش لحق يحفظ نتيجتك فى الجامعة او لو ست الوالدة مش مصدقة كلامك مش حتحتاج غير انها تعمل جوين للجروب بحسبها اللى على الفيس و الادمن اللى هى بنت طنط فتكات صحبتها حتوافق على طول ....

فعليا الست الوالدة حتى لو نتيجتك ذى الزفت مش حتقدر تعترض لانك عندك مليون حجة ..... ذى مثلا دخل علينا فى الجامعة رجال الصعقة علشان يجيبوا طالب كان معاه كتاب جورج اورويل ١٩٨٤ فا لما دخلوا كسروا البنش اللى كنت قاعد عليه فا ملاقتش مكان تحل فيه لحد اخر الامتحان فسقط او ممكن تقولها المظاهرات و قنابل الغاز عمتك عن الورقة ..... الحجج كتير بس انت ركز 

بس تفتكر كل ده حيمنع التزوير فى النتيج بعد ما بقت علنية .... ممممم على ايامي انا كنت نتيجة الدفعة كلها مكتوبة بقلم رصاص يعنى مش محتاج غير ثمن الجومة ( معلش اصلي من اسكندرية فا الجومة = المحاية او المساحة على حسب العربي اللى تعرفه :) ) علشان تظبط امورك 

انا عن نفسي مدفعتش ثمن الجومة مش علشان اخلاق و لا حاجة الفكرة كلها انى كنت شايفة ان التقديرات كلها شبة بعض مدام مفيش نية للدرسات العليا اللى ندمت عليها بعد كده لما كنت فاضية كانت فرصة انى اخذ شهادة مش حعمل بها حاجة ذى اللى قبلها بس كنت حتسلى .... 

المهم يرجع مرجوعنا تانى الى لموضوعنا اللى هو اية مش فاكرة .... اه ان الدنيا بتتغير و حتفضل تتغير لحد ما مش حنصدق نفسنا من اللى بيحصل حولينا .... و شكراً و اهلا و سهلا