Home » Archives for ديسمبر 2014
المشاركات الشائعة
-
اللى قبلنا قاله تعرف الهايف ازاى ؟؟؟؟............ اللى يجي عند الهايفة و يتصدر .......... لكن احنا علشان فى العصر الحديث ممكن نقول ... -
مساء الخير ممكن أقول حاجة بسيطة مش معنى ان سما اترشحت يبقى كسبت مش معنى ان السبكي بيتكرم يبقى هو ده الصح مش معنى ان فيه كلب مات و ... -
مقالة اليوم هى مقالة هزلية لا تمت للجد بصلة فلو قاعد فاضي و عايز تضحك معانا يبقى كمل قراية اما لو كنت بتدور عن مشاكل سياسية يبق... -
- الدعاء : " اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه ولا تجعله ملتبسا علينا فنضل واجعلنا للمتق... -
أحدث مقولة انا قلتها بتقول : قول اللى فى نفسك بصوت عالى ثم أخرس تخيلو لو كل واحد يعمل بالمقولة دى حنرتاح لكن احنا بنفضل نقول اللى احنا عاي...
-
مقالة النهاردة مستوحاة من الصورة دى ..... انا مش عارفة اصلا مين اللى كتبها بس اللى كتابها عنده حق الناس دايماً بتدور ازاي تكتشف ال... -
نفسك تجربي اكلة جديدة من اللى بيجوا فى التلفيزيون بس جوزك مش موافق علشان دقة قديمة يبقى استني مع اول خناقة جاية و اطبخيها و هو علش... -
محدش شاف مغلطش منير مراد لما عمل أغنية محدش شاف علشان يتريق بها على الممثليين و المغنين بتوع زمان اللى كان الاحترام يقف ... -
هل اكتشفت ان لديك عقيدة؟؟؟؟ عايز تعرف مدى تدينك يبقى سافر و اتغرب او الافضل هاجر لدولة غير ناطقة باللغة العربية و ساعتها حتكتشف مدى تع... -
ايوة اوعى تبص للصورة ...... و على فكرة انا سمعة عقلك الباطن بيقول "ملها دى الصورة مفيهاش حاجة " هى لأول وهلة فعلا مفيهاش حاج...
انت مين ؟؟؟
1:57 م |
قبل ما ابداء كلامى احب اقول لكل كل سنة و انتم طيبين سواء كنت و انت بتقراء دلوقتى السنة جديدة بدأت فى اليابان او فاضل كام ساعة ذى فى مصر و الشرق الاوسط او لسة فاضل لها يوم ذى بعض الاماكن فى شمال امريكا و كندا ..... و طبعا علشان اريحك اللى حتقراه هنا عن السنة الجديدة غير اللى قريته فى اى حتة ...... فا نحن نختلف عن الاخريين .... لانى بننظر من منظور تانى ....... و اى تشابة بينه و بين اى حاجة تانية فهو اقرب للخيال .......لول
مع بداية السنة الجديدة طبعا و و و و و و .... دى الحاجات المعتادة علشان كده انا فرتها لكن اللى مش معتاد هو الاتى : كل واحد يوم رأس السنة بيبقى له مشاعر نتيجة لاحداث حزينة او صعيدة من السنة اللى فاتت ..... طبعا انت دلوقتى عزيزى القارئ أخذت بالك ان سعيدة مكتوبة بالصاد مش بالسين و مش بعيد تكون شتمة فى الكاتبة اللى هى انا او قعدت تقهقة و تتريق ...... عموما الله يسمحك يا سيدى و علشان تبقى عارف الغلطة دى مقصودة .....
اندهشت ..... ليه عادى .... مقصودة علشان اوصل لحضرتك حالة من الحالات الموجودة فى الصورة و لما تعرف بالظبط ايه اللى حصلك ... يعنى هل انت دلوقتى سعيد او حزين او مستغرب ... المهم أعرف مشاعرك و بص ع الصورة المضافة مع الموضوع علشان منها تعرف شكل الطاقة اللى بداخلك بقى شكلها ازاى بعد المشاعر اللى جأت لك لما قرأت كلمة صعيدة .....
ببساطة الصورة دى نتاج بحث ع ٧٠٠ واحد تم اختبارهم بطرق معينة فى كل حالة من حلات الانسان علشان يبين لك تأثير مشاعرك ع جسمك ...... و طبعا للى قاعد ورا هناك و بيقول " ايه ده هى بتشتغل فى المجال ده " احب اقولك اكيد لا ... انا بس قريت نتيجة البحث من كام يوم و قلت مع بداية السنة الجديدة تبقى حاجة كويسة انك تعرف مشاعرك بتعمل فيك ايه .... علشان الناس اللى بتكتأب ١٢ شهر فى السنة ، السنة دى ممكن تبقى ساعتها تحاول تعمل حاجة تانية مفيدة لأن ده بيأثر ع الطاقة ... و أديكم شايفين المكتأب بيبقى لونه ازرق و السعيد بيحمر و يصفر من كثر الطاقة الايجابية .......
و للمرة الألف بعد المليون كل عام و انتم بخير......
لا تشترى هذا السنة دى
2:48 م |
كل سنة و انتم جميعاً بخير و بمناسبة السنة الجديدة احب اقدم لكم نصيحة هى مش موضوع النهاردة بس معلش مش حعمل موضوع مخصوص....
المهم نصيحتي لو حضرتك كل سنة بتحضر لستة بالانجازات اللى حتعملها كل سنة و مش بتعمل منهم حاجة يبقى جرب السنة دى متعملش اللستة دى :) انا عارفة ان بتوع التنمية و التطوير البشرية حيقولوا علية سلبية بس احساس الاكتئاب اللى بيجي لنا اخر السنة لما نلاقي مفيش حاجة اتنفذت سيئ جداً و بيقصر على السنة اللى بعدها ... فا جرب المرة دى سيبها على ربنا و مش حتندم....
موضوع النهاردة هو عن الحاجات اللى المفترض انك لا تشترى سنة ٢٠١٥ لانها؟؟؟ حتعرفوا لانها ايه تحت كل صورة:
١. لا تشترى أشتراك فى شبكة تلفيزيون
من الاخر كده كله على اليوتيوب حتى الاعلانات يعني مفيش حاجة حتوحشكم و بعدين مفيش خنقة الانتظار لليوم التانى علشان تعرف ايه اللى حصل فى المسلسل كل اللى عليك تعمله انك تفتح الحلاقات كلها على اليوتيوب و مشاء الله المتطوعين كتير و كله بيسجل اى حاجة بتيجي على التلفيزيون علشان متابعينهم يزيدوا ليه مش عارفة و حيستفيد ايه بردوا مش عارفة بس متزعلهمش و أعمل subscribe سبسكريب لقناتهم و اتفرج ببلاش...
2. لا تشترى مكنة حلاقة جيليت
اه كفاية بقى الناس دى تملك نسبة 66% من مبيعات مكن الحلاقة فى العالم .... فكفاية عليهم كده كل السنين دى ... صحيح ان مكناتهم احسن مكن بس المكن التانى حيحلق و يلمع و كل حاجة و ياريت لو فيه شركة عربية نلتف حوليها و نشترى منها حتكسب كويس و تدخل فلوسنا للدول العربية و لو فى واحدة حكومة كمان ساعتها تدخل فلوسنا الى الدخل القومى .....
3.لا تشترى السيديهات تانى
موضة و خلصت ذى ما خلص قبلها الفلوبي ديسك ........... ال CD و DVD .... كل الحاجات دى أختراعات و خلصت ....
4. لا تشترى الميمورى ستيك
دى بردوا مبقاش لها لازمة بعد ما بقى ممكن تخزن كل اللى نفسك فيه على النت فى ال GDrive او ICloud أو الاختراع الثالث بتاع ميكروسوفت يبقى موضوع التخزين و النقل بقى أسهل ما يمكن و مش محتاج ألاختراع بتاع الميمورى ستيك تانى
5. لا تشترى خدمة الصداقة
طبعا فاكرين الاعلانات الغريبة اللى كانت ظهرت مع ظهور الدش زمان و اللى كان بيقولك اتصل على النمر التالية علشان تكلم البنات الحلوين دول ... فعليا الموضوع بقى سهل مع وجود الفيس بوك و من غير ما حد يزعل فى ناس على الفيس كل اللى هى عايزاه انهم يتعرفوا على اى حد و يتكلموا مع اى حد يمكن الموضوع يتطور الى اى حاجة بردوا و حتى لو أظهرت نفسك ان الاكونت بتاعك لشخص حقيقى و جد الا ان فيه اللى مصمم انه يكتشف الجانب الدنئ اللى فى شخصيتك P:
6. لا تشترى المياه المعدنية
كان نفسي يكون الكلام ده حقيقي الا ان احنا مع التطور اللى احنا بنتطوره كل يوم الا ان المياه مازلات مشكلة حتى دول العالم المتقدم اللى كانت بتنصح رعياها انهم يشربوا المياة من الحنفية فى بلادهم الا انهم بطلوا و شرى المياه المعدنية كل سنة بيزيد بنسبة 4%
.... و مش حفكركم ان سعر المياة المعدنية زاد بنسبة 200% فى مصر بالخصوص
7. لا تشترى الاي باد ميني
لان IPhone 6 plus حجمه بقى قريب من الIPad mini ..... يبقى IPhone 6 plus أحسن لانه تليفون و اى باد فى نفس ذات الوقت .... و الشركة نفسها عارفة كده و هى ضمرت المنتج بتاعها بنفسها ....
أسمع اللى جرا
12:35 م |
سمعتوا اللى حصل ..... ده حصل و حصل و حصل ..... بس اكيد سمعتوا اللى حصل اصل اللى حصل ده ميتسكتش عليه و مش عارفة احنا سكتنا عليه ازاى ؟؟؟؟
نعم حضرتك بتقول ايه ....؟؟ لا لا مسمحش :o ... ما توصلش للشتيمة حضرتك..... انا حقول لك على اللى حصل لو سألت بهدوء :(
اللى حصل ان الشيكولاتة مهددة بالانقراد ايوة ... حاجة تزعل ازاى كدة مش عارفة الخبر الحقيقة بقى له فترة و انا مكنتش مصدقى و قلت اكيد الصحفي الهمام اللى قاعد فى مكتبه بيشرب شاي و بياكل كيك ده اكيد مألفه فقولت لازم ابحث عن الخبر و أصله .....عايزين تعرفه انا عملت كدة ازاى و انا قاعدة بردوا بشرب شاي بس من غير كيك :)
المهم انى اكتشفت ان سنة ٢٠١١ سعر سهم الكاكاو زاد و ده كان بسبب مشاكل فى مناطق الزراعة فى افريقيا و قاله ساعتها ان الشيكولاته حتنتهى فى العالم السنة دى اللى هى احنا فى اخرها ٢٠١٤ و بعدين لما السنة دى عدت على خير رجع السهم زاد تانى فا الباحثين رجعوا قلقوا تانى و قالوا يبقى الكاكاو حينتهي تاني لنفس السبب مع ظهور الايبولا بس المرة دى وسعوا الفترة شوية و حدفوها ل ٢٠٢٠ .... بصوا انا مش بقول انهم غلط و لا صح بس الموضوع يستحق القلق خصوصا لواحدة مثلي ممكن تدعى الاكتئاب علشان متحسش بالذنب و هى بتاكل شيكولاتة لان ذى ما انتوا عارفين ان الشيكولاتة بترفع هرمون السعادة السريتونين فى الدم و فى نفس ذات الوقت بتتخن علشان تفوق من السعادة المزيفة المؤقتة على كارثة حقيقية و هى الوزن الزائد اللى بيطلع و مش بينزل .... P:
المهم خلاصت الموضوع اللى له فى الاسهم انصحك تشترى اسهم مصانع الشيكولاتة لان واضح انه بيطلع على طول ؛) ...... بس ابقى بيعوا قبل ٢٠٢٠ علشان متخسرش ....
لينكات الخبر القديم و الجديد اهم....
معلومة على السريع الصورة دى المفروض تكون هى السبب في انتهاء الشيكولاتة علشان ده اسمه اصراف :) المهم الصورة دى من ٢٠٠٩ لعربية بورش ٩١١ كاريرا اس Porsche 911 Carrera S
لازم نوقف هذا الاصراف .... لانه كله الا الشيكولاتة و انا حبداء من عندى حبداء كل يوم اقلل الاستهلاك بتاعي تدريجيا بأنى اقلل حأكل مكعب أقل ايوة لان الادمان وحش :)
اه و اللى زمانهم بيقولوا فى دماغهم انى تخينة احب اقولهم انكم محتاجين كشف نظر p:
و ختاما احب اقول يومكم سعيد :)
طراطيف الصوابع
11:04 م |
انتوا عارفين كام مرة بمشي علي طراطيف صوبعي تقريبا كل يوم في حياتي يمكن من اول عمر العشر سنين ، عندما اصبح
نهار اليوم لا يكفي لعمل الهوائل من اللا شئ أيون اللا شئ ...... انته عارفين اليوم اللي بنعيشه في كام ساعة من اليقظة ......... ها عارفين ....... فكروه ...
.
.
الصراحة أنا عن نفسي معرفش ، طيب قبل ما اسمع اعتراض ما تيجوه نحسبها مع بعض الشخص الطبيعي من اول دخوله الحضانة بيصحي تقريبا و المفروض الساعة 6 و و طبعا كا طفل آخره 12 ساعة من الحركة المتواصلة و بدون نوم الظهر فا بالتالي بينام الساعة 6 أو 7 ...... بس مع كل سنة بيكبر فيها هذا الطفل لحد ما وعيوه و اهتماماته تزيد تقريبا عند سن العاشرة بيبدأ الاحتياج للسهر و بالتالي ممكن يظل مستيقظا حوال 16 - 18 ساعة طبعا أمام الأهل الطفل ده آخره في عصر جدي الساعة 8 و في عصري أنا كان 10 و ده رقم طبيعي علشان تعرف تصحي تاني يوم الصبح و تفهم اللي بيتحكي لك في الصباح في المدرسة ، لكن الحقيقة كان معايا أنا لا لا لا لا لأني كنت حاجة من اتنين يا بمثل أني نائمة لحد ما ينامون يا أما بنام واصحي تاني و ابدأ في الاحتراف المشي ع أطراف الأصابع و مثل أفلام الاكشن تمشي من حيطة للتانية من غير ما حد يحس بغض النظر عن انت صاحي تعمل إيه ( لعب في لعبة أو تلوين أو طفاسة في الأكل مع أني كنت رفيعة بس اهوي الأكل الصاقع) إلا ان الساسبنس نفسه فظيع و خصوصا لما بيدخله عليك الاوضة وانت عامل فيها ميت مش نائم ( اصل دائماً كان عندى اقتناع ان النائم ده مش بيتنفس) ولان والدتي العزيزة كانت دائماً بتحاول تكتشف الغلطة اللي في الصورة كانت ممكن تفضل واقفة بصالنا بالربع ساعة لحد ما اللي قاطع النفس يموت بجد فكان الحل أني أنام ع جنبي وشي في الحيطة و ساعات كنت بغطي وشي و ده لما تكون عدت كذا مرة فكان نفسي بيروح بجد كل ده علشان أنشطة ممكن تتعمل في النور بس مش بيبقي ليها طعم ...... فين طعم الاكشن .....
و بعدين لما الواحد كبر و الكومبيوتر بدا في التطور بقي الواحد بيصحي يلعب دور في لعبة ما أو جييم ، و كمان لما دخل النت ده فعلا كان اكتشاف و الواحد كان عايز يعرف اكتر عن العالم ده والصفحة اللي من غير برنامج مسجل بتجيب حاجات مختلفة و جديدة مع كل ضغطة..... و ده طبعا في حياة فتاه ،لان الولاد كانه طبعا بيتعامل معاه بطريقة غير البنت يعني بيسمح لهم الخروج لحد و قت معين و بعد ما يرجع و الاهل ينامه يروحوه لابسين و ينزله تاني و العودة طبعا لازم قبل الفجر لان لما يقوموه للصلاه بيبقي فيه تفتيش تاني و ساعتها تلاقي المشهد الكوميدي لما يكون داخل بيتسحب ع اطراف اصابعه و يجد الحج امامه يتوضئ فتلاقي الجملة الشهيرة " ما شاء الله يحج انت صحيت لوحدك علشان تصلي ياحج معاياه في الجامع مع اني ذي ما انت شايف انا ماشي ع طراطيف صوابعي علشان لا اقلق حضرتك " جيل ملهوش حل ...... و ده طبعا كله لحد ثانوية عامة لان بعد التنسيق سبحان الله بتتحول لواحد محترم في الكلية عارف مصلحتك مع ان الفرق كله شهرين ....... ماعلينا خلاص بقي دخلت الكلية و بقي طبيعي تسهر ...... ده بالعكس بقي معايا النوم بتاع السنين كله كنت بنامه في أيام الكلية حتي في المدرج كنت صاحبة مزاج الجلوس في البنش الاول أمام الدكتور فالنص و اول ما اظبط نفسي مع الدكتور أروح رايحة في النوم .... و الدكتور دائماً من الصدمة مكنش بيعترض.
وبعدين الواحد كبر واتجوز وخلف وبداء الاختبار الحقيقي في المشي ع طراطيف الصوابع كأن كل سنين الصبى ما هي غير تدريب للمواقف و الأيام دى ........ ايوه ظهرت فوائد التدريب ...... اذاي أقوم من جنب ابنتي العزيزة وهي نائمة ع السرير بدون ايقاظها و أكمل شغل البيت بدون إصدار نفس مش صوت حتي و المشكلة تحس أنها تابعة لمنظمة جاسوسية ما ...... ايوة كان ليها نظام وهي نائمة علشان تتأكد أني موجودة جنبها ، ببساطة كانت بعد ما تنام بنصف ساعة تبداء تصحي كل ربع ساعة تتأكد أني جنبها اربع مرات وبعدين تروح في النوم لمدة حوالي ساعتين قبل ما تعمل الدورية التانية، فكان لازم لو أنا لسة صاحية اساسا من كتر الجلوس صامتة كنت بنام ، المهم كان بيبدأ لاختبار الحقيقي والتركيز ان لا تتساقط نقطة عرق واحدة ذي تووم كروز في الفيلم إياه ...... و من كتر التركيز في مرة من المرات قمت و أنا مركزة و بصلها رحت لابسه في الشباك من زهولي و محاولة للهرب رحت خبطة ركبتي في السرير و طراخ وقعت ع الأرض ، مشهد يستاهل فيلم من أفلام جيم كاري....... لول بس احب اطمنكوا لم تستيقظ......
أكليه تكسبيه
12:35 م |
نفسك تجربي اكلة جديدة من اللى بيجوا فى التلفيزيون بس جوزك مش موافق علشان دقة قديمة يبقى استني مع اول خناقة جاية و اطبخيها و هو علشان متخانق مش حيتكلم او يعترض :)
بس وانتى بتقدميها اعملى لها اسم شيك و قولى له انك جبتي وصفة من ايطاليا و طبختيها على بوتجاز المانى علشان يحس بطعم فرنسا فى بيته و الخناقة حتنتهى على طول :) و بكدة تبقي عملتى اللى فى دماغك و هو مبسوط ؛)
دكتور ألحقني
10:11 م |
عزيزي القارئ لو سألت نفسك السؤال ده وانت عند دكتور يبقى متنساش تكتب تعليق تحت و تقول اه انا فكرت فيه قبل كده فعلاً و على فكرة التعليق تحت مفتوح للضيوف اللى من غير حساب جوجل يعني ملكش حجة ....
المهم بقى السؤال هو ايه؟؟؟
؟؟؟
؟؟؟
" هى ليه كل المجلات اللى موجودة فى العيادة قديمة؟؟؟"
لا تقلق انا عملت زيك وفكرت فى السؤال و تنشط و خلاص لكن الحقيقة احنا طنشنا علشان احنا ناس زهقانة مش عندها اهتمام انها تجيب حلول لكن برة لا برة بحثوا و دوروا و عملوا تجربة كمان علشان يعرفوا ايه السبب... من الاخر كدة جابوا مجلات جديدة على قديمة و منها مجلات سياسية و مجلات نميمة مجتمعية و رقموهم و سبوهم شهر فى عيادة و راحوا اخر الشهر و لاقو ان ٤٧٪ من المجلات اختفوا و للمعلومة هما كانوا بادئين ب ٨٧ مجلة و راح منهم ٤١ :(
و الألذ ان اللى اتاخذ مشكل قديم على جديد ، سياسي على بتوع نم ..... و لكن اهم ما يجب ذكره ان اللى اختفوا هم الارخص في السعر ... P:
طبعاً انت ممكن تشوف انه بحث ملهوش لازمة لكن فعلياً اللى يقدر يحدد اهميته من عدمه هما دارسي علم الاجتماع اللى المفروض من خلال تجارب مماثلة بيقدروا يعرفوا و يتوقعوا تصرفات المجتمع لاى حاجة لكن الحقيقة ان الناس دي اخرها عندنا فى الدول العربية بيشتغلوا مشرفين فى مدارس .... ما علينا ... مش موضوعنا اساساً
لكن اللى موضوعنا اديك عرفت ان المريض اللى المفروض يتقي ربنا علشان ربنا يشفيه بيروح العيادة علشان يسرق المجلات :(
و يومكم سعيد و يشفي جميع مرضاكم
السمعة
11:17 ص |
السمعة
انا دايماً مع مقولة الاهم من الشغل تظبيط الشغل .... الاتقان مهم حتى لو كنت بتشتغل حرامى ... مخضوض ليه من الكلام اسمع منى ده الحرامى ده بالذات محتاج ان يتقن شغله علشان سمعته ما تضربش فى السوق طبعا و بكرة يعملوا موقع للحرامية علشان الناس تدخل و تكتب رأيها فى السرقة المقدمة ...
طيب بص على الصورة دى وقرأها كدة و سمعنى رائيك
مش ده لو كان له موقع فيه reviews حلوة ( يعنى ايه review يعني تعليقات بتتكتب بعد تجربة خدمة ما علشان الناس التانية تستفاد من خبرتك و تجربتك) كان ريح الراجل اللى اتسرق قبل كده من السؤال من اليسوى و ميسواش ده غير ان الناس بعد كدة حتشك فى الراجل ده انه شريك الحرامى و يمكن يتشتم كمان ...
فا يا جماعة اللى فيكم فاضي و فاقد حياته ينوبه ثواب فالحرامية و يعمل لهم موقع و خصوصا حرمية العربيات علشان بيطلبوا فدية و محتاجين الناس تثق فيهم ... اه و طبعا ابقى اعمل للحرامية اسماء مستعارةعلشان ميتقبضش عليهم و انت ممكن قدام تاخذ منهم نسبة ....
و لا قولك عزيزي الحرامى اعمل لك حساب على الجى مايل و خلى الناس تسيب لك تعليق على جوجل ..... :)
الحياة حلوة حتى الوحش فيها دمه خفيف بردوا ؛)
البحث عن فضيحة
10:12 م |
صبح صبح مسى مسى النهاردة انا محتجاكم فى مشكلة عويصة اوى .... أيوة و لازم تردوا و تقولوا لى اعمل أيه ؟؟؟؟
بنتى أمبارح جات و قالت لى " يا مامى فى بنت عندنا بتسرق" انا بعد الخضة من الجملة قلت " هو انتى أصلا عارفة يعنى اية سرقة" قالت لى " اه هي أخدت من شنطت بنت تانية حاجة " أنا " طيب و بعدين محدش قال للمدرسة " هى " لا بس حد قال للبنت و هى كذبت و قالت انها مش سرقت"
اه انا نسيت أقول لكم ان بنتى فى سنة اولى أبتدائى و اللى بتقوله ده شئ لا يصدقه عقل .... طبعا الواحد فى الحالات دى لازم يلعبها صح مع البنت علشان المستقبل و دور الام التربوي و بناء المجتمع و كلام كتير كده بيظهر فى دماغى فجأة مع المواقف اللى ذى دى...
ها قولوا لى و شوروا عليا انتم كا امهات الماضي و الحاضر و المستقبل تعملوا ايه فى الموقف ذى ده و طبعا انتم كا أباء الماضي والحاضر و المستقبل بردوا ممكن تعملوا ايه فى موقف ذى ده ؟؟؟؟
ها فكروا .....
فكروا كمان انا عايزة ابني بنتي علشان تكون عضو صالح فى المجتمع ....
ها؟؟؟؟
فكرتوا ...؟؟؟
فكرتوا خلاص ؟؟؟؟
بصوا من الاخر كده اللى انا عملته انى اتكلمت مع بنتى علشان متنقلش كلام عن حاجة لم تراها لان ذى ما حتقول النهاردة بكرة حد حيطلع عليها كلام كمان و الأهم من ده كله ان الموقف ده أشاعة ممكن يكون الولد اللى قال انه شاف البنت بتسرق متغاظ منها مثلا علشان مرضتش تلعب معاه(اه بتحصل ) ..... يعنى من الاخر كده ده نوع من البلطجة على الطفلة دى و ده بيحصل كتير جدا حتى فى حياتنا احنا كا كبار يعنى مثلا كده لما تلاقي واحد ظريف جايب لك فيديو صوت لاتنين بيتكلموا مع بعض فى التليفون و اتنين انت أساسا عمرك ما سمعت صوتهم قبل كده و لأحلى انه جاى يقولك ان الصوت الاول ده لفلان و التانى لفلان الفلانى و بيتكلموا عن موضوع كبير اوى يهز الرأى العام ...........طبعا انت تسمع الكلام ده و تعمل ايه بدورك تروح ماسك اللينك بتاع الفيديو او الاوديو ده وهاتك يا نشر فى كل الصحف و المجلات .... طبعا ما هى فضيحة و حتجيب لايكات كتير !!!!!
:( عزيزى المواطن عزيزتى المواطنة فكروا فى اللى بتعمله قبل ما تعمله مش كل ما تسمع أشاعة هوبا تروح ناشرها و مصدقها لان حتى لو كانت الاشاعة دى حتنصر مظلوم لانك بكده تكون ظلمت حد تانى و المظلوم عمره ما ينصر بباطل ... فا ما بنى على باطل فهو باطل ..... و اللى انت بتعمله ده زى بالظبط ما الطلبة عملوه مع البنت نوع من انواع البلطجة ....
ناس بيتكلموا فى مكلمة ناس انت متعرفهمش و لا تعرف بيتكلموا ازاى و و لا تعرف صوتهم يبقى على اى أساس أيه تقول انهم هما ... زى بردوا اللى يجيب لك ناس تمثل دايلوج بين اتنين قالوه في جلسة سرية و المفترض منى أسمع و أصدق طيب على اساس ايه الكلام بتاع الجلسة اتسرب لك انت و انت شخصيا مكنتش هناك ........
و أخر حاجة أحب أستدل بأية من سورة النور :
إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُمْ مَا لَيْسَ لَكُمْ بِهِ عِلْمٌ وَتَحْسَبُونَهُ هَيِّنًا وَهُوَ عِنْدَ اللَّهِ عَظِيمٌ ﴿١٥﴾
يعنى متحدفوش الكلام ذى ما سمعتوه من غير ما تفكروا فيه الاول خصوصا انكم ليس لكم علم به أصلا ( يعنى لا تنقل الاشاعة) لان الموضوع عند ربنا كبير......
دى لم تكن حصة وعظ.... هما بس كانوا كلمتين واقفين فى زورى و ارجعوا زرونا بكرة تانى علشان تلاقوا مواضيع ربما تكون مبهجة أكتر من كده ..... :)
امسك غلطة
3:47 م |
مقالة النهاردة مستوحاة من الصورة دى .....
انا مش عارفة اصلا مين اللى كتبها بس اللى كتابها عنده حق الناس دايماً بتدور ازاي تكتشف الغلطة اللى فى الصورة علشان تتأكد انك ناقص ذيها .....ابسط مثال بتبقى نازل فى قمة الاناقة و الشياكة تلاقي الناس مسكاك من فوق لتحت مش علشان معجبة لكن علشان تكتشف الغلطة اللى فيك اللى على اساسها حترتاح لأنك انت مش احسن منها ... و ده اللى يمكن خلا الناس كلها لما بتيجي تحكي لك حاجة بتبداء بالكوارث علشان تحسسك الاول ان احنا كلنا فى الهوا سوى و ان حلاوتى دى مش بالساهل و بلتالى تسيبهم في حالهم ....
من منطق المجتمع محدش كامل و محدش حيأخذ اربعة و عشرين قيراط لكن من منطق الخالق ربنا بيهب لمن يشاء اى شئ و بغير حساب يعني ممكن حد يأخذ الاربعة و عشرين قيراط كلهم حاجات حلوة و يدخل الجنة كمان فا ليه الناس مش بترضى الخير لبعض .... المهم دايما لما حد بينجح بيظهر له اعداء النجاح اللى بيفلوا فى الانجازات اللى بيعملها و خلونا نمسك مثال النهاردة الافلام .... مثلا فيلم فروزن بتاع ديزني انا كنت فى ذهول لما عرفت انهم
طلعوا منه ٣٣ غلطة اساساً مش فارقين فى القصة كلها اخطاء في نقل الصورة من مشهد لمشهد يعني مثلاً لقطة بتنط على كرسي مكنش موجود فى المشهد اللى قبله انا شخصياً كا مشاهد محستش ان الموضوع ضايقنى او يستاهل انك انت تضيع وقتك علشان تجمعهم وتسجل فيديو عن الغلاطات .... طيب فكر فيها كده مثلاً لو سألت المخرج "مين حضرتك" حيقول " انا فلان الفلانى اللى عمل الفيلم العيم اللي حقق ايرادات عظيمة" طيب و" حضرتك؟؟؟" " انا بقى فلان الفلانى اللى قاعد له على الواحدة" .... بجد هى شغلتك دى مهنة اصلاً لا و تلاقي مواقع و فيديوهات بالهبل عن الغلاطات ..... طيب ليه بدل ماتحاول ان تبدع في حاجة تانية انت قاعد مرقد له علشان تثبت للناس انه غلط انه مش محترم و ضحك عليكم و عمل حاجات غلط في المشاهد ..... مفيش اى نقد بناء كلها تصيد لأخطاء مش موجودة اصلاً .... انا اللى عجبنى انى كنت شفت الكلام ده زمان على كام فيلم عربى و اتارى دى بردوا تشبة بالغرب .....
ارحم نفسك و ارضى بحالك و حالك مش حينصلح لما غيرك يخرب حاله
اللينك للفيديو غلاطات فروزن اهوه : http://youtu.be/ZN7mWHvwlBg
و فى موقع لأخطاء الافلام الاجنبى كلها اهوه:
الطفولة و توابعها
10:35 ص |
محدش يقدر ينكر ان الطفولة شئ رائع براءة و عفوية و لا فيها شئ غير النقاء و ضحك و لعب ...... انتوا صدقتوا و لا ايه الكلام ده لما تكون انت الطفل لكن غير كدة هى حاجة كده ذي السمك الصغير اللى بتعيش على ظهر سمكة القرش و تفضل لازقة فيه و ماشية وراه فى كل مكان مع الفرق ان اللى على ظهر سمكة القرش كائن هادى مش بيفتح بقوه غير علشان ياكل لكن الطفل كائن معجب بصوته بشكل متواصل و فى كل حالاته ... انا اللى نفسي اعرفه هل الاطفال مش بيجلهم صداع زينا من الاصوات الكتير دى لازم حد يعمل لنا بحث في الموضوع ده و يقولنا
طيب انا حقول لكم على فكرة كويسة انا حتصل حالا بدكتور أطفال صديقي ....
ترن ترن
" الو "
" اهلا يادكتر يا ابو الدكاترة كلهم " معلش لازم الحركات دى ما انتم عرفين ان السؤال ده ببلاش فلازم الواحد يعمل بالفلوس اللى مش حتدفع اى حركات p:
" كنت عايزة اسأل حضرتك يا كبير الدكاترة كلهم هى الاطفال مش بيجلهم صداع خالص من صوتهم؟؟"
الدكتور " الحقيقة الاطفال ممكن يجي لهم صداع بس مش من اصوتهم لكن من دور برد او اى مشكلة صحية ممكن تجيب صداع"
تمام شكرا يعني من بعد ما قلبنا المقالة الى خمسة لصحتك موصلناش لاى حاجة .... مممم ماعلينا المهم نرجع لكلمنا عن الكائن اللى اسمه الطفل و خصوصا لو هو او هى اول طفل ساعتها بتكون الام و الاب بيتعملوا مع الطفل كأنه قنبلة نووية و خايفين تنفجر يعنى مثلا الشيل بحساب و لها طقوس و بسم الله و حضن جامد خايف يقع و ممكن تفضل ممسمر ذراعك ساعات علشان بس ميصحاش من النوم و يكمل نومه فى حضن الام الدافئ و لا فى الشيل علشان تحطه في سريره و هو نايم (طبعاً سريره الجديد ) بتبقى مستعد تعمل له غرفة مبطنة علشان تمتص الصوت و الصدمات علشان لقدر الله لو وقع يكون ساعتها فى مكان امن ..... و لا الاكل اول طفل ده ملاك اللى نفسه فيه لازم يتعمل ....عايز بطاطس يبقى لازم بطاطس ان شاء الله بطيخ في الشتاء يبقى نجيب بطيخ من القمر مش مهم
لكن تعالى بقى على الطفل الثاني ده بينام على صوت التلفيزيون فى الصالة فوق الكانبة و لو شايله علشان يكمل نومه و وقع على الارض يبقى قدر الله و مشاء فعل ..... اما بقى الاكل فالجودة بل موجوده ان شاء الله تبن و لو مش عايز ياكل يبقى اللى ياكل على درسه ينفع نفسه .... اه و لسة فى مثل كمان اللى ياكل قد الزبيبة لا فيه داهية و لا مصيبة .... و طبعاً كل هدوم الطفل اللي قبله بتبقى بتاعته الجديد قليل اوى
ايوة يا فندم سمعاك بتقول امال اللى عندهم عشر عيال بيعملوا ايه اقول لك ان اى اطفال بعد الثالث بيبقى مسؤلية حد من الاقارب علشان يربي يعنى يا عمتوا يا خلتوا يا جده او جدته لازم حد تانى غير الاب اللى صدع و الام اللى طلعت من هدومها :)
ارجوا اى اكون فرفشة ما تبقى من يومكم :)
أنا بشارطة و انت
10:35 م |
كنت بقراء قصة من كام يوم ولقيت البطل بيقول للبطلة انتى بشارطة بردوا راحت البطلة بصة للبطل و قالت له يعنى أية بشارطة .... راح بصص لها و قال لها يعنى .........
انا بقى حقول لكم يعني أيه ..... الاول صباح الخير و مساءه ..........( برافو عليك ياللى اخذت بالك ان سمعت السطر الاخير ده فى حتة و خصوصا فى فيديو ما .... هو فعلا انا سرقاه من واحد أسمه زين بيعمل فيديوهات على اليوتيوب بس الجملة عجبتنى لانها مجمعة صباح الخير و مساء الخير فا من الاخر كده بتلخص ذى الموضوع بتاع النهاردة كده عموما انا بردوا لو كنت كتبت صباح الخير و مساء الخير من الاول كان زمانى وفرت عليك قرأت ال3 سطور اللى فاته :) )
الشارطة اللى كانت مزعلة البطلة اوى هى حال كل الناس دلوقتى والغريب فى الموضوع انها كمان حال الغرب دلوقتى لان القصة اللى كنت بقراها دى أسمها ليس انت بل أنا قصة لكاتبة أستراليه... ماعلينا بمحتوى القصة لانها عاطيفية شوية المهم انا أكتشفت انهم هما كمان عندهم الشارطة ..... من الاخر كده هى العلامة دى " \ " و المقصود بها انها بتوضع كافاصل بين مهن الفرض الواحد .... يعنى انا كمثال : كاتبة \ رسامة \ صيدلانية ....... ها فهمته انا أقصد أية و انا كمان أختصرتهم لانى لو أضفت المهن اللى أشتغلتها قبل كده ذى مدرسة \ مترجمة \ مندوبة شركة تأمين \ معيدة ....... مش حنخلص .......
بس هو ده حال مجتمعنا العربي و الغريب انه الغربي كمان , كل الناس بتشتغل بأكتر من وظيفة يا أما لانها فى ضائق مادى او لانها بتحاول تدور على ذاتها .... و الشرط دى مش للمهن بس بل للمواهب و الاهتمامات .... الانسان ذى الطبيعة متنوع فى أهتماماته و فى أفكاره لاكتر من سبب بس أهمهم هو للتكيف مع المجتمع .... يعني مثال أخر تلاقي انه خريج أداب قسم لغة عربية مثلا بيشتغل مبلط بينما حد تانى خريج زراعة هو اللى بيدرس لغة عربية فى المدرسة ..... و هكذا و الامثلة لو بدأناها مش حنخلص المهم ان اللى من غير شارطة على ما أظن ان عددهم قليل بس هل نقدر نقول عليهم محظوظين انهم ثابتين على مبدأهم انا عن نفسي مقدرش أقول انهم محظوظين لانى انا شخصيا سعيدة بالتنوع اللى انا فيه لانى قبلت فى كل مهنة الكثير من البشر بأشكال و اللوان مختلفة اتعرفت على ثقافات مختلفة مكنتش بشفها و انا نوع واحد بس ..... يعنى الفئة اللى انا شفتها و انا صيدلانية غير اللى انا شفتها و انا مدرسة و اكيد مختلفة تماما عن اللى قبلتهم و انا مندوبة دعاية و تختلف تماما عن اللى كنت بتعامل معاهم و انا رسامة كل شارطة و لها جمالها و لها سحرها .......
انا النهاردة مش جاية اتكلم عن نفسي لكن علشان أقول لك انك لست وحدك وان اللى مثلك كتير و مدام انت مبسوط يبقى عيش و سيبنا نعيش و بلاش نبرة الحزن على اللى درسته او المهن اللى راحت منك ..... :)
يومكم سعيد ملئ بالحلويات .......... بس أبقوا أدعكوا سننكم كويس علشان التسوس D:
و على رأى الأستاذ ابراهيم الفقي :
“عش كل لحظة وكأنها آخر لحظة في حياتك
عش بحبك لله عز وجل
عش بالتطبع بأخلاق الرسول عليه الصلاة والسلام
عش بالأمل ، عش بالكفاح ، عش بالصبر
عش بالحب ، وقدر قيمة الحياة .”
لو فى حياتك شرط كتير شاركنا تحت فى التعليقات بكام واحدة منهم :)
انت و السفر و هواك
2:24 م |
اهلا و سهلا....
بقالى كتير بأخذ وادى مع نفسي ع كل حاجة واى حاجة لان مؤخرا مشاء الله نفسي بقت مثقفة اوى ..... المهم انا و نفسي اكتشفنا ان خلال الاربع السنين الماضية سكنت فى حوالى اربع شقق فى مناطق مختلفة غير محسوب فيهم المصايف و كل شقة كانت بتبقى غير مجهزة غير ب السرير و الدولاب و البوتجاز و الثلاجة بس.....اه واكيد طبعا الحمام ده مفيش خلاف ع انه موجود في كل شقة حتى لو كان بدروم .....طيب بغض النظر انا ليه اتنقلت كتير الا انى من كثر تنقلى فكرت مليا انى اكتب كتاب عن ' كيفية جعل اى مكان من لا شئ الى مكان اسمه منزل '..... و ع فكرة لاى حد بيقراء و بيضحك و يقول "مين حيشتريه " احب اقولك ان اللى اشتره كتاب بحاله عن أشكال ترابيزات القهوة اكيد حيشتروا كتاب ذى ده ، اصل ببساطة كده افرض دلوقتى حد جاء و قالك لو سمحت حضرتك بكرة تسيب الشقة دى و تروح تسكن فى مكان تانى ، ايه هى الحاجات اللى حتيجي ع بالك انك لازم تأخذها معاك غير هدومك فى المكان الجديد ده علشان تحس فيه نفس احساس البيت القديم و انه يكون اسمه بيت ؟؟؟؟؟؟ بصوا انا فى اول مرة اطلب منى الطلب ده كنت بحاول انى اخذ كل حاجة انا بحبها معايا لكن طبعا الموضوع فشل فشل زريع لانى انا من الناس اللى بتشتري اى قطعة فى البيت بعد تفكير عميق ، لازم احس بالحاجة قبل ما أشتريها فا بالتالى التخلى عنها بيكون صعب حتى اللى بيعرفنى حيعرف انى لما احب اتبرع عادة بيكون عبارة عن فلوس او حاجات اشتريها مخصوص للتبرع لكن مش من عادتى انى ادى من حاجتى لانى تعبت اوى علشان انقيها ..... فطبعا الموضوع مش بينفع مع النقل و خصوصا لو كان من ضمن النقل سفر من مكان لمكان فانا ساعتها بكون محدودة بالوزن ..... طيب احل المشكلة دى اذاى كان فى فكرة تانية هى مثلا لو القطعة دى ورق ، ذى كتاب او صور يبقى أسكنها و أخذها معايا...... بردوا الموضوع فشل مين عنده وقت فاضي للعملية دى .....اسكنها و اظبتها و اسيف و الكمبيوتر يهنج و اعيد من الاول فالموضوع انتهى بالحاجات دى فى صناديق ع بيت العيلة علشان ميضيعوش ....... طيب لو الحاجات اللى عايزة اخذها عبارة عن قطع ثابتة ذى ابجورة او طقم اكل او قهوة او ادوات منزلية ، دى حلها اية ؟؟؟؟ ... و اللهى دى كمان انتهت الى صندوق وضع فى أوضتى في بيت العيلة ...... طيب لو ملابس بردوا انتهى نصوا فى صندوق فى بيت العيلة و الحقيقة مع كل نقلة الصناديق فى اوضتى بتزيد لحد ما اوضتى مبقاش باين لها ملامح و اتقلبت الى مخزن كبير ....
بس انا بقى عرفت اللى فيها مع كل نقلة و بقى الموضوع سهل و بقيت عارفة اول ما حد يقولى يلا انقلى فأنا عارفة بالظبط انقل اية.....
اولا الملابس : نأخذ الاساسيات ذى عدد بنطلون جينز و جيبة جينز و تيشيرت و قميص و ٢ بدى كارينا و عدد عشرين الف طرحة ( و محدش يسألنى ليه كل الطرح دى لانى معنديش اجابة لها دائما و ابداً عندى اقتناع ان لو مفيش هدوم حا أخيط الطرح مع بعضها و يبقوا بلوزات مثلا ) و جزمة و سندل و بوط ... و البوط قبل الباقى حتى لو الجو حر لأن البوط مهم لانه بيدى شكل حلو.....
ثانيا المطبخ للي بيعرف يطبخ يبقى اهم حاجة هى طاسة تيفال و حلة و مصفى و مضرب سلك ( اللى هى بتاعة ضرب البيض) و مقص و فتاحة علب و سكينة حلوة .... بس طيب ليه .... ليه ... بصوا من الاخر كده هى دى القطع اللى بتبقى صعبة تلاقيها خصوصا لو فى بلد غريبة اول مرة تروحها و هى دى الحاجات اللى بتسهل الحياة لعمل اكلات سريعة و مغذية معبال ما تعرف اية المطاعم الموجودة او تعرف تجيب منين أكل و بهارات و الخ
بس هى دى الاساسيات اللى ممكن تحتاجها و بعدين اى اضافة للبيت بتخليه لطيف ذى الكراسي و الكنب و أكيد التلفيزيون و الخ
بس إهم حاجة اكتشفتها من كل اللف و الدواران و البيوت ان المشكلة مش من بيت او وطن اللى بيكره الواحد من الاوطان هم الاشخاص يعنى من الاخر كده مهما بعدت الى أخر بقاع الارض و حصلك الشخص الغير مناسب هو وحده السبب فى جعل المكان ده جهنم الحمرا ...... و ده بالظبط اللى بيحصل فى مصر .... لان بداخل اغلب المصريين واحد فهلوى اللى بيستغل كل الفرص لعمل كل ما يخترق به القانون ، و عن اقتناع ان هو كده الكسبان و شتارة منه للتغلب ع الممنوع..... لدرجة انى بحس ان لازم يغيروا النشيد الوطنى و يخله ' بلادى بلادى بلادى كل الممنوع مرغوب فى بلادى ' مش عارفة اقول ايه لكن مفيش فعلا فالدنيا أحلى من بلادى لو فيها ناس تانية غير الموجودين دلوقتى .....
و للحديث أكيد بقية مرة تانية ان شاء الله .....
انت و الويكيبيديا
11:14 ص |
النهاردة انا كنت محتارة اكتب اية و كل ده بسببكم على فكرة ايوة فين التفاعل اكتبوا تعليق اى تعليق .... حتى الشتيمة انا قابلة بها عارفين ليه مش علشان انا بحب اتشتم ابداً لكن ده معناه انك قريت و فهمت و اعترضت فكونك اعتطني الوقت بتاعك علشان تعترض ده فى حد ذاته شئ يسعدنى .......يعنى حتى لو تكتبوا تقولوا العربي بتاعك وحش يسلام ماشي رغم انى عارفة بس كفاية انك دخلت تقول كدة ..... و ممكن تكتبوا عن المواضيع اللى تحبوا اكتب لكم عنها سواء كانت عنوين بعينها او تصنيفات عامة.....
المهم بعد تفكير عميق و بعد مباحثات مع مساعدتى اللى هى انا بردوا أفتكرت حاجة كانت حصلت مرة على الفيس بوك و هو كان نعى نزل من أحد مدرسي كلية صيدلة ( الكلية اللى اتخرجت منها ..... مدهوش ليه عادي كل الناس بتعمل حاجات تانية خالص غير اللى هى درستها مش انا اول واحدة يعنى ) المهم و كتب اسماها فلانة الفلانية و علشان انا ذاكرتى للأسماء شبة ذاكرت السمكة فأنا مش قادرة أفتكر هى مين و شكلها ايه ..... و بالنسبة لى انا مش بنسى الوشوش ابداً حتى لو مش فاكرة الاسم بس الوش استحالة انساه ..... فطبعا لجأت الى صديقي العزيز جوجل بيه اسم الله عليه اللى مش عارفة من غيره كنا حنعمل ايه فى الدنيا دي و بدأت ادور على أسم الست دى .... و كانت المفجأه جوجل مش عنده اى خبر عنها رغم انها رئيسة قسم لكن الست معملتش انجاز واحد علشان يتكتب عنها فى موقع على النت و حتى مش لها صفحة على ويكيبيديا تخيلوا ..... انا كنت فعلاً فى ذهول .... طيب
ده ويكيبيديا حتى مفتوح لاى حد يكتب فيه يعنى كل واحد ممكن يدخل يكتب صفحته بنفسه .... فل نفترض انها علشان كانت ست كبيرة اوى ( ايوة كليتنا فيها ناس من العصور الوسطى لان الشباب يا بتقعد في البيت فى أجازة بدون مرتب او الرجالة بتهاجر لجامعات برة فا مش فاضل غير بتوع زمان دول) فا ملهاش فى النت بس كانت ممكن كلفت حد من تلمذتها او زملائها يعملها لها ...... بس ارجع و أقول ان دى شغلت الكلية المفروض هى لو فعلاً
فرحانة بالدكاترة بتوعها تعمل هى لهم كا دور واجب صفحات على الويكبيديا او مواقع عريقة عن كده حتى ..... بس بردوا ارجع و اقول ما يمكن هى معندهاش انجاز غير انها اشتغلت معيدة و عملت دكتوراه و فضلت فى السلم الوظيفي لحد ما بقت رئيسة قسم و خلاص و لم تستغل منصبها كا دكتورة فى جامعة عريقة و أضافت من خلال تجربة او اتنين اى شئ فى عالم الدواء ........ أسألة كتيرة فعلاً.... و ملهاش اجابة غير انها عملت ذي ما اي موظف بيعمل في حياته عايش و خلاص و الله اعلم كانت بتشتغل بضمير او لا لانى انا اساساً مش فاكراها علشان احكى لكم عنها .... بس الحادثة دى رغم انها بسيطة خلتنى لفترة مش صغيرة أفكر انا لو فرقت الحياة دلوقتي عائلتي حيفتكرونى بأيه (مش حروح و ازود فيها و أقول المجتمع كفاية اوى عائلتي) هل حيفتكرونى بأكل و شرب بس و لا بموقف او نجاح .....انا شخصياً لحد دلوقتى اكل و شرب بس و يمكن هو ده اللى جعلنى عملت الصفحة اللى انتوا بتقروا فيها دلوقتى كا محاولة انى انجحها يمكن اعرف احفر اسمى من نور فى ذاكرة التاريخ و ذاكرة الويكيبيديا و ربنا يسهل....
السؤال الاهم بقى هل انت عزيزي القارئ لك صفحة على الويكيبيديا...... و هل انت اصلا عايز و لا حلو انت اوى كده ......
انا مش جاية انكد عليكوا بس فكروا لان دايما أخرت التفكير غالبا بيكون حل....
يومكم سعيد
ملحوظة : تعليقك يهمنا و يسعدنا و يساعدنا فى كتابة كل ما هو الافضل لك و للمجتمع
الحرية ياعنية
4:04 ص |
جديد العالم اليوم جاى لكم من أمريكا من البيت الابيض نفسه........... :)
الحرية
عنوان شأك انا عرفة رغم انى حجيب اطرافه..... طول عمرنا و كلمة الحرية بتيجي وراها كلمتين و هما ان انت حر ان لم تضر ..... فا بلتالى بمجرد ان شخص تضرر من حريتك يبقى انت عديت حدود الحرية و انتهكت مساحة غيرك ..... طبعاً الكل حيقرا الكلام ده و يقول لك نظرى ...... مممممممم فى أرض الواقع العربي نعم هو مش بس نظري لا و كمان خيالي .... لان احنا عندنا فى الدول العربية لو لم اضع كلمتين تنتهك اب و ام الشخص اللى بنتقضه يبقى انا مأخذتش حريتي كاملة تبقى ناقصة البهارات و طبعاً مين يقدر يأكل إكلة من غير بهارات و الحركات ؟؟؟؟؟ تبقى الاكلة بلا طعمة على رأى أخونا ببلاد الشام ....
لكن خارج القطر العربي الحرية لها حدود و قواعد و اداب و خطواط يجب ان تتبع و اذا انتهكت طبعا القانون بيأخذ مجراه حتى لو الطرف التانى لم يرفع قضية او حتى اذا كان الرأى ده على الفيس بوك ( اللى عندنا فاكرينه غرفة مغلقة مبطنة عن مسامع و مراقبة الله و المجتمع) ..... طيب قبل ما تزهقوا و تملوا منى احب اعرفكم بشخصية ظريفة أسمها Elizabeth Lauten, أليزابيث لوتن الست بعد حفلة عيد الشكر اللى ظهر فيها الرئيس أمريكى براك اوباما و معاه بناته ،راحت كتبت على صفحتها بالفيس بوك كتبت انتقادة شديدة شوية للبنتين على الرغم من الكلام مكنش فيه شتيمة بمعنى الكلمة الا انها تانى كتبة على صفحتها بالفيس بوك بردوا أعتذار عن ما كتبته و انها كبرت و عقلت على حد تعبيرها .
Elizabeth Lauten, the communications director for Republican. Stephen Fincher هى اليزابيث ، مدير الاتصالات للنائب بالحزب الجمهورى ستيفن فينشر .....مركزها حساس ممكن علشان كده ترجعت عن اللى كتبته و اللى كان كالاتى :
"عزيزاتي ساشا وماليا، أعلم انكم فى تلك السنوات المراهقة فظيعة، ولكن أنتم جزءا من الأسرة الأولى، فا حولوا ان تبينوا بعض من المستوى الرفيع على الأقل أن تحترموا الدور الذي تقوموا به. حتى لو مرة أخرى أمك وأبيك لا تحترم مواقفها كثيرا، أو حتى الأمة لهذه المسألة، لذلك انا أتخمن أنكم لا تفعلوا الكثير في قسم "جيد يحتذى به". ومع ذلك، أرتقوا بأنفسكم حتى ترتفعوا إلى مستوى الحدث كأن البيت الأبيض مهم لك. اللبسوا ملابس كأنكم تستحقون الاحترام، وليس كأنكم في حانة. وبالتأكيد لا تجعل وجوهكم تفعل حركات خلال المناسبات العامة المتلفزة."
جدير بالذكر ان ساشا 13 سنة و ماليا 16 سنة ........ المهم ده اللى كتبته الاول و خلال ساعات راحت انهالت عليها تعليقات و انتقادات كثيرة على تويتر حتى انهم عملوا هاش تاج بأسمها علشان تعرف شتيمها بنفسها ..... فا الست فاقت للجريمة اللى ارتكبتها و راحت شايلة الكلام ده من على الفيس بوك و كتبت أعتذار كالاتى :
"أنا حكمت على اثنين من السيدات الشابات بطريقة سريعة فى المقالة بطريقة لم أكن لأرغب في أن يحكم على عندما كنت مراهقا و قالت و بعد عدة ساعات من صلاة، والتحدث إلى والدي وإعادة قراءة كلماتي على الانترنت، أستطيع أن أرى بوضوح أكثر كيف مؤذية كلماتي و اعلموا أن هذه المشاعر المنتقدة ليس لها مكان في قلبي. وعلاوة على ذلك، أود الاعتذار لجميع أولئك الذين أنا أضررت وأساءت بكلماتي، وأتعهد أن أكبر و أتعلم (وأنا أؤكد لكم أن الان قد حدث) من هذه التجربة "
و للمعلومة كمان انها قدمت أستقالتها اليوم من منصبها ..... أنا شخصيا اشك ان يكون حد أجبرها على الاستقالة لكن رد فعل الشارع التويتري هو اللى تعبها لان هو الواضح ان المجتمع الامريكي مش بيفوت الهفوة و بعنرض جامد على تويتر من خلال 140 حرف ( اللى بيسمح بهم تويتر فى البوست الواحد ) يقدر ان يحدث بلبلة من غير شتيمة و قلت قيمة .....
طيعا هى مستقبلها المهنى انتهى لحد كده دلوقتى و على ما اظن بما انها أعتذرت فا غالبا حيجيبوها الى منصب أعلى لانهم غير عندنا بيحترموا اللى بيعتذر أوى حتى لو كانت غلتطه أيه .......
و نقف هنا يحضارات و نرجع و نقول أشتركوا فى بريد الصفحة حتى يصل لكم كل ما هو جديد و لا تقلقوا ان حد ممكن يأخذ ايميلاتكم لان نظام الاشتراك كله تابع لجوجل فا هى التى تحمى المعلومات و لا تصل الى حد غريب ابدا :)
الدنيا ملها بردت كده ليه مرة واحدة
1:49 ص |
مقالة اليوم هى مقالة هزلية لا تمت للجد بصلة فلو قاعد فاضي و عايز تضحك معانا يبقى كمل قراية اما لو كنت بتدور عن مشاكل سياسية يبقى اتفضل امشي من هنا لأنى قررت افرفش الجو شوية بمقالة خفيفة مش نكدية .... وعجبي
الساقعة داخلة علينا بقلب شئ لا يصدقه عقل فعلا بشر و لا بنى ادمين حتى.... و رغم كده الواحد بيبقى نفسه فصل الشتاء يجي بسرعة اول ما ازياء الشتى تنزل و عنيك تتزغلل فى أشكال البوط و الجاكت و الكوفيات و وووو وحاجات الشتى الحلوة دى بس نصيحة منى خلى الصيف شغال طول السنة و لو على اللبس شغل التكيف على الاخر و البسهم فى البيت مش لازم ابداً نثلج كلنا علشان واحدة و لا واحد اشتروا جاكيت جديد ......
و يدخل علينا الشتاء بزعبيبه مرة واحده و بعدها يقعد له اسبوع من غير نقطة مية طيب ليه !!! لية ما يجيش طول الاسبوع بس على خفيف ....
بس الشتاء حلو بردوا و شعور مختلف ما هو التغير حلو مفيش كلام البلاد اللى مصممة على فصل واحد طول السنة بيجي لهم اكتئاب و بينتحروا فا مفيش كلام الشتاء حلو خصوصاً لما تصحى الصبح من الدفى و تروح على الثلاجة علشان تطلع اللبن بعد ما تكون اتجمدت علشان قال ايه تعمل كوب شاى .....
و الاجمل من ده كله لما تدخل تأخذ دوش .... و ده غالبا بعد تفكير عميق عن امتى بالظبط حتتخلى عن الهدوم هل قبل ما تدخل تحت المية و لا بعدها و الحيرة الاكبر هل درجة الغليان المية كافية انها تدفيك و لا لا و يجرى ايه يعنى لما تستحمى تحت البطنية ...... و طبعاً بتدخل بعد ما بتدى كل اللى فى البيت انذار بالدبح لو حد سولت له نفسه فتح حنفية المطبخ و سحب منك المية ده غلباً مش بيموت موتة طبيعية .... :)
الشتاء الحقيقة بيرجع الوصلة بين الواحد و جسمه بترجع تتعرف على اعضائك خصوصا المثانة اللى بتفضل تسألها ميت مرة قبل ما تنام لو هى عايزة تدخل الحمام و لا لا فا تفضل تقول لك لا و رغم كده مش بتسمع كلمها و بتروح و بعد كدة تروح مصحياك نص الليل علشان سقعت و عايزة تدخل الحمام و انت بقى ساعتها استحالة حد يطلعك من تحت الدفئ اللى انت فيه و تفضل تكلمها و تعمل تحليل داخلى مع اعضاء الجسم علشان يقيموا هل انت فعلا محتاج تروح و لا لا و النسبة المليانة دى كتير و لا قليل و معبال ما تخلص مبحثاتك بيكون النهار طلع و انت و لا نمت و لا حاجة و ياريتك قمت من ساعتها و معملتش فيها محلل سياسي .... :(
بس الواحد لا يقدر ان ينكر ان الشتاء جماله فى لمتنا حول التلفزيون جنب الدفاية مع فيلم حلو او مسلسل و جنبك معونة أسرة بأكملها من اللب و السودانى و الشيكولاتة و الشيبسي و الموبايل و النت و الفيس لوك و انت بكدة تكون فى الجنة و نعيمها ......
رغم اننا بنفقد الاستمتاع بأحدى ملذات الحياة و هى المية الساقعة اللى بتفضل ساقعة على طول طول الشتاء رغم اننا بنكون العكس المرة دى عايزينها سخنة ..... تخيل كده لو مية كانت ماشية العكس يعنى فى الشتاء سخن و فى الصيف ساقعة الوحدة مش كانت كل مشاكلنا خلصت :)) بس رغم كل ده بنشربها و هى ساقعة لان الجو بيكون ساقع اوى علشان نضحى بالدفى و نروح نسخنها .....
ياريت تكلمونا عن تقوسكم مع الشتاء و الحلو اللى فيه و الوحش و شكراً
يومكم سعيد
#الشتاء حلو مفيش كلام
#مصر
#الرئيس
#الحياة